Rom Laikhak (Alian: 16, Aneu:433)

Rom Khua Khristiante Tungah Paul' Laikhak pen Rom khua-a a om pawlpite kiangah hawhsawm ahih manin Paul in a gelh ahi hi. Ama gelna pen, tua lai-a a om Khristiante lakah tawlkhat na a sep khit ciangin amaute' huhna mah tawh Spain gamah paisuak lai ding ahi hi. Khristian upna thu leh tua upna pen Khristiante nuntakna-ah a kizatna zia dingte ama theihna tawh kizui-in a gentelna dingin a gelh ahi hi. Paul' thugen a thupiteng khempeuh hih laibu sungah a cingtakin a om hi. Rom khua-a om pawlpite hopihna leh amaute-a' ding thu a ngetsaknate a gen khit ciangin a laikhak a ngimna bulpi ahi, a kipata kipan a tawp dongin upna hangin mite, amah tawh a kipawl thei dingin Pasian in hong bawl hi (1:17), cihna thu Paul in a gen hi. Tua ciangin Paul in a thu bulphuh a kicingin a gen hi. Jew mi leh Gentail mi, mi khempeuh a kibangin mawhna khutnuai-ah om ahih manin Pasian tawh a kipawlkik theih ding kisam hi. Mite in Jesuh Khrih a upna uh hangin Pasian tawh kipawlkik thei uh hi. Tua ciangin Pasian tawh kipawl thakna hangin Khrih thu sungah nuntak thakna thu a gen hi. Thu um mite, Pasian tawh kilem uh a, mawhna leh sihna khutnuai panin Pasian' Kha Siangtho in a suaktasak hi. A lian 5-8 sungah Pasian' Thukham a deihna leh thu um mite' nuntakna-ah Kha Siangtho in vang a neihna thu zong Paul in a gen hi. Tua ciangin mihingte-a' dingin Pasian' gelna sungah Jew mite leh Gentail mite a lutkhawm theihna dingzia a gen hi. Jew mite in Jesuh a nialna pen Jesuh Khrih' hangin Pasian' hehpihna thupha in minam khempeuh a battheihna dingin Pasian' gelna ahihna, leh Jew mite in a tawntungin Jesuh a nial paisuak lohna ding a upna thu tawh a khum hi. A tawpna-ah Khristiante bangci nuntak ding, a diakdiakin itna thu tawh kisai-in midangte tawh bangci kizop ding cih thu Paul in a gelh hi. Pasian' nasepna ding thu, Khristiante a hong uk kumpite tung leh khatlekhat tungah tavuan a neihna uh, leh eima lungsim-ah man i sak pen bangin i gamtat ding thute a gen hi. Tua ciangin ama aituam thugenna leh Pasian phatna thute tawh a laigelh a khum hi.